Despois de anunciar a próxima celebración da XXXI edición da “Festa da Lagosta e da Cociña Mariñeira” para a fin de semana do 30 de xuño ao 2 de xullo, o Concello da Guarda vén de desvelar o programa de actividades que ten preparado, con entretemento para todos, maiores e pequenos, que Ler máis
Despois de anunciar a próxima celebración da XXXI edición da “Festa da Lagosta e da Cociña Mariñeira” para a fin de semana do 30 de xuño ao 2 de xullo, o Concello da Guarda vén de desvelar o programa de actividades que ten preparado, con entretemento para todos, maiores e pequenos, que se desenvolverá ao longo dos tres días nos que ten lugar esta festa.
O pistoletazo de saída terá lugar o venres día 30, ás 20:30h, na praza do Reló da Guarda co tradicional pregón, este ano a cargo do humorista David Perdomo, a entrega da distinción “Lagosta de Honra” ao premiado desta edición e a benvida do alcalde, Roberto Carrero, a todos os asistentes.
Dende aí, o eixo da festa desprazarase ao porto da vila, tendo lugar as diferentes actuacións na contorna da carpa na que estarán instalados os postos dos restaurantes participantes, rodeado todo iso dun ambiente mariñeiro, tradicional e, sobre todo, festivo. De maneira resumida, as actuacións máis destacables son as seguintes:
Sábado, 1 de xullo
- Ás 20:00h, Lila Star. Un espectáculo familiar cheo de circo, música e humor.
- Ás 23:00h, Os D’Abaixo. Concerto deste destacado conxunto de folk galego.
Domingo, 2 de xullo
- Ás 20:00h, De Vacas. Concerto deste innovador grupo cunha homenaxe ás mulleres do pop.
Así mesmo, dentro do programa inclúense tamén pasarrúas durante os días da festa, inxables de auga para nenos no areal da Ribeira durante o sábado e o domingo de 16:30 a 19:30h, unha feira de artesanía con postos de diferentes especialidades e saídas do volanteiro “Piueiro” para todos aqueles que queiran descubrir a navegación nunha embarcación mariñeira tradicional do pobo da Guarda.
Por último, destacar que, con motivo da Festa da Lagosta, o programa da TVG “Aquí Galicia” realizarase dende A Guarda, con diferentes entrevistas de xente do pobo e actuacións de asociacións locais.
Con este intenso programa, aqueles que se acheguen ata A Guarda a degustar os diferentes pratos e menús ofrecidos nesta festa gastronómica terán á súa disposición unha amplísima oferta cultural e de lecer que vale a pena non perderse.
