Na mañá do martes 26 de xuño o concello portugués de Póvoa de Varzim acolleu a presentación oficial da XXVIII edición da Festa da Lagosta e da Cociña Mariñeira, Festa de Interese Turístico de Galicia que terá lugar os vindeiros días 6, 7 e 8 de xullo na Ler máis
Na mañá do martes 26 de xuño o municipio portugués de Póvoa 
de Varzim acolleu a presentación oficial da XXVIII edición da Festa da Lagosta e da Cociña Mariñeira, Festa de Interese Turístico de Galicia que terá lugar os próximos días 6, 7 e 8 de xullo no Concello da Guarda.
Cada ano realízase a presentación oficial nunha vila galega ou portuguesa e este ano escolleuse a Póvoa de Varzim, vila mariñeira igual que A Guarda e que comparten unha forte vinculación ao longo dos anos.
O paseo marítimo desta vila foi o escenario desta presentación que estivo amenizada polo grupo “Do Lusco ó Fusco”.
Neste acolledor espazo os establecementos colaboradores ofreceron unha mostra dos pratos e produtos que se poderán degustar nesta festa de recoñecido prestixio e un dos eventos gastronómicos máis importantes de Galicia.
Nesta presentación interviron o Alcalde da Guarda, D. Antonio Lomba Baz, e a Concelleira de Turismo, Dna. Montserrat Magallanes, acompañados do Vicepresidente da Cámara de Póvoa de Varzim, D. Luís Diamantino Carvalho Batista e a Concelleira de Turismo, Dna. María Lucinda Campos Amorim Ramos Sousa Delgado.
O acto comezou coa intervención do Vice-Presidente da Cámara de Póvoa de Varzim, quen destacou a estreita vinculación de ambas as vilas, coas marcas dos mariñeiros que tanto se están a promocionar. María Lucinda Campos, Concelleira de Turismo da Cámara de Póvoa de Varzim agradeceu que se elixise este municipio para a presentación desta festa gastronómica recoñecida como festa de Interese Turístico de Galicia. O alcalde da Guarda, Antonio Lomba Baz, continuou explicando aos presentes a importancia da festa para a vila da Guarda e aproveitou para dar a coñecer as novidades da programación desta edición, con actividades para todas as idades e públicos.
Pola súa banda Montserrat Magallanes, Concelleira de Turismo do Concello da Guarda, eloxiou ao Municipio de Póvoa de Varzim, invitando a todos os presentes a achegarse ata A Guarda a degustar os produtos do mar e a ampla programación de actividades previstas.
Na XXVIII Festa da Lagosta e da Cociña Mariñeira poderase degustar unha ampla variedade de produtos do mar, sobremesas e viños. A ración de Lagosta custará 25€, pero tamén haberá outras tapas como percebes, luras, lagostinos, mexillóns, navallas, polbo… a prezos populares. No apartado de sobremesas, non podería faltar a Rosca de Yema, con racións desde 1,50 €.
Programación variada e para todas as idades
A XXVIII Festa da Lagosta e da Cociña Mariñeira terá inicio o venres 6 de xullo co acto de lectura do pregón na Praza do Reloxo ás 21:00h, que nesta edición recae no recoñecido actor, humorista e cantante galego Nancho Novo. Esa mesma noite ás 22:30h realizará unha actuación na carpa do Porto, presentando o seu espectáculo “O Cavernícola”.
Na xornada do sábado 7 de xullo repartiranse ao longo do día varias actuacións musicais a cargo dos grupos A Boalleira, Acevedos Delgados e Mitic, así como un espectáculo de maxia a cargo de Valeria Varitas. Destacan tamén neste día as actividades infantís e deportivas, coa XXIII edición da Travesía a Nado do Porto da Guarda.
O domingo 8 de xullo amenizarán a xornada os grupos A Boalleira, Acevedos Delgados, Peter Punk e Brais das Hortas, contando coa actuación estelar de Celina da Piedade, nunha noite na que o fado será o protagonista. Tamén destaca neste día o obradoiro infantil de Mini-Chef ou o espectáculo cómico de Roi Borrallas.
Durante toda a fin de semana A Guarda ofrecerá visitas guiadas á Rede de Museos, formada polo Museo do Mar, o Castelo de Santa Cruz e o Monte de Santa Trega, haberá unha gran feira de artesanía e zona lúdica e infantil, con inchables acuáticos (non vos esquezades o traxe de baño!). Tamén se disporá dunha pantalla xigante para o seguimento dos partidos do Mundial de Fútbol.
