A Guarda promóvese ante axencias de viaxes especializadas no FAIRWAY, Forum do Camiño

O Concello da Guarda participou por cuarta vez nas xornadas profesionais de Fairway, o V Foro do Camiño de Santiago que se celebrou o pasado xoves e venres no Pazo de Congresos e Exposición de Galicia de Santiago de Compostela.

Durante os dous días, o Concello da Guarda participou no Workshop, o espazo dedicado ás reunións de traballo no que estiveron presentes ao redor de 40 axencias de viaxes e touroperadores de 16 países.

 

Estas reunións de traballo permitiron o intercambio de información entre as axencias e o Concello. Ademais de promocionar A Guarda como primeiro municipio galego do Camiño Portugués da Costa e tamén como punto de partida do camiño, buscamos coñecer das propias axencias as súas experiencias e as necesidades dos peregrinos actuais.

 

Nos máis de 30 encontros celebrados aproveitouse para destacar A Guarda como destino turístico coas súas grandes referentes: o Monte Santa Trega, a cultura mariñeira, a gastronomía e, sen esquecer, o seu moi relevante patrimonio natural e cultural.

 

Estes contactos mantidos coas axencias e turoperadores confirmaron que estas empresas xa teñen o noso municipio dentro da súa oferta pero si valoraron a nova información para mellorar os seus produtos.

 

No caso doutras empresas que asistiron á Feira para comezar a dar os pasos para comercializar novos produtos, valoraron moi positivamente a información da Guarda e o noso camiño. Esta semana xa continuaron estes contactos, polo que o próximo ano novas axencias ofrecerán A Guarda como punto de partida, o que facilitará aos peregrinos coñecer con máis detalle o noso municipio antes de iniciar a peregrinación a Santiago.

 

No tramo aberto ao público, o Camiño Portugués da Costa estivo presente no stand de Turismo de Rías Baixas e no stand de Turismo de Galicia.