O venres día 7 de xuño a Casa dos Alonsos da Guarda acolleu a inauguración da Exposición fotográfica sobre as Alfombras Florais na Guarda, unha mostra que recolle a través de varias fotografías a historia desta arraigada tradición na Guarda, xunto con explicacións sobre como é este traballo. En Ler máis
O venres día 7 de xuño a Casa dos Alonsos da Guarda acolleu a inauguración da Exposición fotográfica sobre as Alfombras Florais na Guarda, unha mostra que recolle a través de varias fotografías a historia desta arraigada tradición na Guarda, xunto con explicacións sobre como é este traballo.
No acto de inauguración interviñeron o Alcalde en funcións, Antonio Lomba e a Presidenta da Asociación Cultural Alfombras da Guarda, Mª Emilia Baz, contando coa presenza de numerosas persoas que participan cada ano na elaboración das Alfombras Florais na Guarda.
A Asociación Cultural Alfombras da Guarda, creada en 2018, é a encargada na actualidade de velar pola promoción e manter a tradición histórica das alfombras florais do Corpus no pobo da Guarda, así como dar a coñecer, pór en valor e visualizar o traballo e orgullo que supón para os seus veciños, membros e colaboradores á poboación guardesa en xeral.
A Exposición, que leva por nome «Alfombras Florais da Guarda», estará na Casa dos Alonsos ata o domingo 23 de xuño en horario de 11:00h a 13:30h e de 18:00h a 21:00h.
«Alfombras Florais da Guarda» é unha mostra que recolle o percorrido da tradición da creación de alfombras elaboradas con flores e outros ornamentos naturais para vestir as rúas da vila en datas especiais. Trátase dun costume cunha longa traxectoria na vila e cun importante bagaxe cultural vinculado inicialmente ao ámbito relixioso e que forma parte sen dúbida do patrimonio cultural da vila guardesa. A Exposición tamén recolle o proceso da súa elaboración, co desfoliado do verde, o corte da flor, o marcado do deseño, o perfilado, a elaboración e os detalles finais.
Existen informacións antigas que deixan constancia da importancia da celebración da Festa do Corpus na Guarda xa dende o século XVIII, sendo a celebración do Corpus Christi e do Santísimo Sacramento as principais festas cívico-relixiosas do pobo da Guarda.
Nesta exposición abórdase a temática dende tres puntos de vista, por unha banda o aspecto histórico, repasando os antecedentes e datas sinaladas sen as cales non se entendería a grandeza desta festividade, por outra banda o Organizativo, mostrando como se organizan e elaboran as alfombras e xa para finalizar o aspecto dos percorridos, representando as rúas onde se fan as alfombras, os rezos e bendicións e demais celebracións asociadas a este evento.
