Dende o comezo da desescalada e co inicio da volta á nova normalidade, o Concello da Guarda reuniuse cos diferentes sectores comerciais e do tecido económico da vila promovendo ademais accións de recuperación tras a Covid-19 para apoiar á economía e á reactivación turística Ler máis
Dende o comezo da desescalada e co inicio da volta á nova normalidade, o Concello da Guarda reuniuse cos diferentes sectores comerciais e do tecido económico da vila promovendo ademais accións de recuperación tras a Covid-19 para apoiar á economía e á reactivación turística da vila.
Xa dende o inicio da pandemia, apoiouse aos diferentes sectores comerciais na repartición de material de protección para os traballadores e na difusión a través das redes sociais, daqueles establecementos que ofertaban reparto a domicilio.
Traballouse tamén durante o confinamento para que dende a semana pasada na Guarda arrincase o Marketplace www.mercanaguarda.com, que pretende funcionar como un gran mercado virtual onde estean representados aqueles comercios, negocios de restauración, postos do mercado municipal e mesmo autónomos/as ou empresarios/as do sector primario da localidade que desexen vender os seus produtos de forma online, non só a nivel local senón tamén no resto de España e Portugal.
Tamén se teñen realizado accións e traballado en diferentes medidas económicas, entre elas, a de posibilitar a ampliación de terrazas e a eliminación das taxas das mesmas no 2020.
Para poder escoitar e valorar as diversas accións que se levarán a cabo durante este verán 2020 de cara ao turismo e á reactivación económica, o Concello da Guarda reuniuse co sector da Pastelería-Panadaría o pasado martes 12 de Maio. Nesta reunión, na que estaban presentes a Técnica de Turismo, a Concelleira de Turismo e a Concelleira de Desenvolvemento Local, valorouse retomar a promoción do noso produto doce por excelencia, a “Rosca de Xema da Guarda”, creada no seo da Pastelería Montserrat no ano 1956.
O día 3 de Xuño foi o día no que se reuniron Hostaleiros, Cafetarías e Bares, para poder valorar conxuntamente posibles accións enfocadas a un turismo de proximidade e foráneo, ademais de escoitar as súas demandas e dúbidas xeradas pola “nova normalidade”. Así, nesta reunión, unha das iniciativas que xurdiron foi a de recibir asesoramento e formación para afrontar esta nova situación nos seus establecementos. Dita formación, será levada a cabo o vindeiro luns día 15 de xuño e todos os interesados nesta formación contarán co asesoramento durante o verán para resolver futuras dúbidas, ante a previsión de cambios na desescalada ou nova normalidade.
Os establecementos interesados en participar nesta formación poden inscribirse ata o xoves 11 de xuño a través do correo electrónico turismo@aguarda.es ou no teléfono 620 795 901.
Tal e como se anunciou a pasada semana, A Guarda contará tamén cunha comisión especial para a reactivación económica formada por representantes de diferentes sectores da vila, que traballará de forma coordinada co equipo de goberno para buscar solucións e apoiar aos negocios locais nestes duros momentos.
