O Xeodestino Ría de Vigo e Baixo Miño, do que forma parte o Concello da Guarda, segue a dar pasos adiante para ofrecer un turismo de calidade, sostible, profesional e integrador. Liderado por Eu Rural e coa implicación dos 14 municipios do territorio, o Xeodestino obtivo 1,5 millóns de euros para o seu Plan Ler máis
O Xeodestino Ría de Vigo e Baixo Miño, do que forma parte o Concello da Guarda, segue dando pasos adiante para ofrecer un turismo de calidade, sostible, profesional e integrador. Liderado por Eu Rural e coa implicación dos 14 municipios do territorio, o Xeodestino obtivo 1,5 millóns de euros para o seu Plan de Sostibilidade Turística en Destino, ‘A Despensa de Galicia’, que busca transformar o modelo turístico do territorio en base ao potencial da súa gastronomía. Este plan conta con financiamento do Ministerio de Industria, Comercio e Turismo para impulsar a transformación do territorio en base a un produto turístico sostible a través dos fondos europeos Next Generation.
Rafa Álvarez, Concelleiro de Turismo da Guarda, valorou moi positivamente o proxecto ‘A Despensa de Galicia’, que repercutirá na mellora de todo o territorio con proxectos específicos en cada municipio e actuacións tamén na Guarda, que suman ao PSTD da Guarda, co que tamén o noso municipio recibirá 1 millón de euros, nun ambicioso proxecto que se presentará oficialmente nun futuro próximo. “Sen dúbida unha importante aposta do goberno do estado coa Guarda e a súa contorna, que se plasmará en proxectos que os nosos veciños e visitantes poderán gozar”, dixo Rafa Álvarez.
“Hoxe é un día moi importante para nós, porque entre todos logramos poñer en marcha un novo proxecto que axudará a dinamizar e adaptar o noso sector turístico ás novas necesidades”, enfatizou Juan A. González, representante institucional de Xeodestino e alcalde de Nigrán durante a presentación do Plan de Sostibilidade Turística en Destino (PSTD) este mércores no Centro Empresarial Porto do Molle, en Nigrán. Como enfatizou González, “en Xeodestino temos o compromiso de deixar de pensar no local e actuar como un todo. Por iso o noso PSTD non é unha repartición de actuacións ou orzamento entre os 14 municipios que o compoñen, senón unha planificación estratéxica que facemos a nivel turístico, centrándonos naquelas intervencións clave que consideramos poden axudar a mellorar o noso sector e facernos máis competitivo”.Este plan será “unha oportunidade única para financiar actuacións transformadoras e coa profundidade suficiente para converter a Ría de Vigo e o Baixo Miño nun destino sostible, innovador, competitivo e rendible co que atraer un turismo de alto valor engadido baseado na calidade e a sustentabilidade”, sinalou a presidenta da Asociación de Desenvolvemento Rural Galicia Suroeste Eu Rural e alcaldesa de Tomiño, Sandra González. Un paso moi importante, xa que, como lembrou o presidente durante a presentación, “o plan tamén apoiará a economía local, apostará pola saúde, o medio ambiente, o desenvolvemento dos territorios dende o punto de vista da sustentabilidade, o patrimonio, a cultura, a profesionalización e calidade do sector, para a promoción e dinamización conxunta e, sobre todo, para apostar polas empresas que temos no territorio que fan que o noso destino turístico sexa cada ano mellor, máis respectuoso e de maior calidade”.
O PSTD prevé a posta en marcha de diferentes iniciativas centradas en catro eixos de actuación diferentes. Para unha transición verde, o plan impulsará intervencións para a rexeneración de espazos de gran valor ambiental, a rehabilitación de infraestruturas turísticas para adaptarse ao cambio climático, a mellora da xestión de residuos en festivais gastronómicos ou a creación dunha rede de miradoiros. Nesta liña de sustentabilidade e para afondar na eficiencia enerxética, no marco do plan crearanse itinerarios ciclistas na contorna dos recursos gastronómicos, reforzarase a rede de sendeiros homologados e acometeranse proxectos de iluminación monumental para elementos significativos do patrimonio histórico do Xeodestino Ría de Vigo e Baixo Miño.Buscando a dixitalización do destino turístico, realizaranse accións para enriquecer e mellorar a interpretación do patrimonio material e inmaterial vinculado ao viño e a gastronomía, e adoptaranse solucións intelixentes para mellorar a sinalización turística. Ademais, o PSTD pretende canalizar esforzos cara ao sector privado buscando unha maior competitividade e consolidando o turismo como motor de desenvolvemento económico, polo que apoiará as ringleiras da cadea de valor máis vinculadas á alimentación e o viño para a súa transformación e para a incorporación de innovación nos seus procesos, co obxectivo de potenciar a gastronomía e os produtos locais. Completarase cunha acción específica de turismo industrial, que fomentará a creación de rutas e experiencias en torno a elementos do patrimonio gastronómico e enolóxico do territorio.O acto de presentación do PSTD tamén contou coa participación do Delegado do Goberno en Galicia, José Manuel Miñones, quen lembrou que a obtención dos fondos servirá para “consolidar este Xeodestino como motor de cambio e desenvolvemento económico do territorio. Traballar cun plan ben feito que responda ao obxectivo da cohesión territorial, porque a unión fai a forza, e da transformación do turismo dende o punto de vista da sustentabilidade”.
Unha sustentabilidade “tamén económica e social”, tal e como sinalou a directora de Turismo de Galicia, Nava Castro, quen se mostrou convencida de que “o Xeodestino reúne todas as características necesarias para posicionarse a nivel galego pero tamén a nivel nacional e incluso, no futuro, a nivel internacional”. Pola súa banda, o presidente do Clúster Turismo de Galicia, Cesáreo Pardal, destacou que “non se pode entender o turismo sen esta colaboración público-privada, unha colaboración que se inclúe neste plan de Xeodestino que, sen dúbida, seguirá atraendo xente a Galicia”.No acto de presentación tamén participaron a subdelegada do Goberno de Galicia, María do Carmen Larriba; o representante de Zona Franca de Vigo, David Regades; o alcalde de Baiona, Carlos Gómez; o alcalde de Fornelos de Montes, Emiliano Lage; o alcalde de Gondomar, Paco González; a alcaldesa de Mos, Nidia Arévalo; o alcalde de Porriño, Alejandro Lorenzo; a alcaldesa do Rosal, Ánxela Fernández Callís; a alcaldesa de Oia, Cristina Correa; a alcaldesa de Redondela, Digna Rivas; o alcalde de Soutomaior, Agustín Reguera; concelleiros, así como persoal técnico e empresas dos 14 municipios que compoñen o Xeodestino Ría de Vigo e Baixo Miño.Neste PSTD, a enogastronomía convértese na escusa perfecta para aglutinar actuacións que configuran un xeodestino tan heteroxéneo como o da Ría de Vigo e Baixo Miño, que aglutina os municipios da Guarda, Baiona, Fornelos de Montes, Gondomar, Mos, Nigrán, O Porriño, O Rosal, Oia, Pazos de Borbén, Redondela, Soutomaior, Tomiño e Tui. O plan foi o resultado dun proceso participativo con encontros con actores do sector público e privado do ecosistema turístico dos 14 municipios do territorio e incluso unha enquisa aberta ao público en xeral.