A programación cultural e lúdica de cara á fin de semana comeza esta mesma tarde co "homenaxe aos asasinados en Camposancos", organizado polo Sindicato de Pensionistas de Comisións Obreiras (CC.OO.) da comarca de Vigo. O acto empezará ás 17:30 horas na fosa común do cemiterio de Sestás, onde os Ler máis
A programación cultural e lúdica de cara á fin de semana comeza esta mesma tarde co «homenaxe aos asasinados en Camposancos», organizado polo Sindicato de Pensionistas de Comisións Obreiras (CC.OO.) da comarca de Vigo.
O acto empezará ás 17:30 horas na fosa común do cemiterio de Sestás, onde os asistentes realizarán unha ofrenda floral en honra ás vítimas do franquismo. Chegadas as 19:00 horas, a celebración continuará no Centro Cultural, onde o alcalde da Guarda, Antonio Lomba, presentará a charla titulada «Os consellos de Guerra: a xustiza do revés», que posteriormente guiará o investigador e historiador vigués, Bernardo Vázquez.
Mañá, 27 de outubro, a psicóloga e traballadora do centro San Xerome Emiliani, Joana L. Pereira, será a encargada de dar comezo á terceira edición do ciclo «Diálogos en Educación». A charla, titulada «Educación consciente, baseada en ‘mindfulness’», terá lugar na Casa dos Alonso a partir das 20:30 horas. Preséntase como unha actividade aberta ao público e participativa, de interese para persoas de diferentes perfís.
A promoción da saúde física e mental das mulleres, pola súa banda, será a temática do ciclo de charlas «Coidate, muller!», organizada pola Asociación de Mulleres Progresistas da Guarda e que arrincará mañá coa disertación sobre «O exercicio físico e a prevención de lesións musculares». A licenciada en Ciencias da Actividade Física e do Deporte, Ana González Portela, será a encargada de dirixir este primeiro encontro, que se celebrará no Centro Cultural a partir das 20:00 horas.
O sábado, a lectura e o audiovisual serán os protagonistas da xornada. Para os máis pequenos, a Biblioteca Municipal organiza unha sesión especial da actividade «Contos contados» dedicada ao Samaín, a partir das 11:30 horas. Así, «Andrés cabeza abaixo» será a lectura do día e, seguidamente, os participantes poderán elaborar un ‘marcapáxinas terrorífico’ no obradoiro de manualidades.Ademais, ata o vindeiro 7 de novembro celebraranse as xornadas tituladas «Biblioteca solidaria», nas que aquelas persoas que se acheguen ata o espazo de lecer e lectura municipal poderán escoller un libro descatalogado a cambio de aportar unha unidade de alimentos non perecedoiros.
Por outra banda, a segunda edición do «Ciclo Camposancos de Cinema» regresará este sábado á parroquia guardesa. A partir das 20:30 horas terá lugar na Casa Cultural da Comunidade de Montes de Camposancos, organizadora do evento, o encontro titulado «Tódolos segredos de ‘Era Visto!’. Unha serie da TVG distinta, nun mercado cambiante» no que participará o coordinador creativo da TVG e post-produtor da serie, Daniel González.
Celebrando o Samaín
A xornada do martes, previa á celebración do Día de Todos os Santos, estará caracterizada pola temática do medo. Nesta liña, os comerciantes do Mercado do Relo organizan unha serie de actividades dirixidas a todos os públicos, comezando ás 17:30 horas cos «Obradoiros de Samaín» na rúa Pacífico Rodríguez. Ás 19:00 horas, o grupo Perseide ofrecerá un concerto no local Kanella’s Café e, xa pasada a medianoite, a celebración continuará coa actuación de Punkieteras no local As Pozas Disco-Tasca, onde tamén se realizará unha queimada.
A programación complétase coa celebración dunha «Andaina Nocturna do Terror», que dará comezo ás 21:00 horas desde a rúa Pacífico Rodríguez e rematará preto das 00:30 horas no mesmo punto, cunha chocolatada e churros gratuítos para os camiñantes. Para participar na actividade é preciso inscribirse previamente, chamando aos teléfonos 986 611 601 e 647 368 933.
A Casa Cultural da Comunidade de Montes de Camposancos tamén acollerá unha «Festa de Samaín», que empezará ás 17:00 horas cun obradoiro de cabazas e continuará cunha merenda e un obradoiro de maquillaxe. A continuación, a celebración na parroquia guardesa rematará cunha «Andaina terrorífica» pola rúas de Camposancos.
A asociación de empresarios AGUDE, pola súa banda, xa encheu os escaparates das súas tendas e as rúas da Guarda de meigas, que permanecerán entre nós ata o vindeiro 1 de novembro.
