Os bares e restaurantes participantes amosaron hoxe as súas creacións, que poderán degustarse as fins de semana dende o 18 de maio ata o 3 de xuño. | Os «ruteros» poderán conseguir premios directos e participar no sorteo dun smartphone Samsung Galaxy 7J. A Casa dos Alonso acolleu esta mañá a presentación da Ler máis
Os bares e restaurantes participantes amosaron hoxe as súas creacións, que poderán degustarse as fins de semana dende o 18 de maio ata o 3 de xuño. | Os «ruteros» poderán conseguir premios directos e participar no sorteo dun smartphone Samsung Galaxy 7J.
A Casa dos Alonso acolleu esta mañá a presentación da sexta edición da ruta gastronómica «Tapearte», que se celebrará na Guarda os venres, sábados e domingos dende o 18 de maio ata o 3 de xuño. Ao acto de presentación acudiron o alcalde do Concello da Guarda, Antonio Lomba; a concelleira de Turismo, Montserrat Magallanes; e representantes dos 19 establecementos participantes: Alameda, Art Café, Bitadorna, Boc & Pix, Camping Santa Tecla, Celtic, El Paseo, Enxebre, Kanella’s, La Botica, La Casilla, La Pizzicata, Marbella, Novo Funil, O Cangrexal, Pool Chaos, Xantar, Xeito e Y la luna?.
Os hostaleiros e hostaleiras guardesas aproveitaron o encontro para amosar as súas respectivas tapas, que ofrecerán a un prezo único de 2€ (bebida non incluída) durante tres fins de semana consecutivos. As e os comensais poderán degustar dende un volován recheo de marisco ata un salteado de arroz e verduras ou unha hamburguesa «patagónica» de peixe espada. Unha variedade de tapas «do máximo nivel», capaz de conformar aos padais máis exquisitos.
O alcalde lembrou que a ruta nace co obxectivo de potenciar a «excelente gastronomía local» e promocionar as populares alfombras florais que se realizarán no casco antigo do pobo durante a noite do 2 de xuño. Segundo engadiu Lomba, esta nova edición contará cun horario ampliado para a degustación dos pratos, que será de 12 a 14 h e de 19 a 22 h, atendendo ás peticións dos hostaleiros.
Agasallos para os «ruteros»
Os «ruteros» e as «ruteras» contarán cun pasaporte no que, ademais de atopar a información detallada sobre cada unha das tapas, poderán selar aquelas que degustaran e participar no sorteo dun smartphone Samsung Galaxy 7J. Para isto, será necesario depositar os pasaportes cun mínimo de 6 selos nas urnas que estarán dispoñibles en cada un dos establecementos participantes e na Oficina de Turismo do Concello da Guarda. Ademais, aquelas persoas que reúnan un mínimo de 10 selos, recibirán como agasallo directo un lote de viño Pazo de Seoane da Adega Lagar de Fornelos (O Rosal).
No seu pasaporte, os participantes na ruta poderán tamén valorar a calidade das tapas consumidas. Froito desta valoración, a organización anunciará os gañadores do Concurso da Mellor Tapa «Tapearte 2018», con premios en dúas categorías: a tapa mellor valorada e a preparación máis consumida.
